Saturday, December 28, 2024
Gjakova Presss

34 vjet me Radio Gjakovën

Radio-Gjakova nga 9 nëntori i këtij viti ka hyrë në vitin e 35 të fillimit të punës dhe veprimtarisë së suksesshme, si medium i parë lokal i informimit në komunë.

Tridhjetë e katër vjet më parë, me fillimin e punës së Radio Gjakovës, mozaikut të institucioneve të kulturës në komunë ju shtua edhe një dritare e re, përmes së cilës jo vetëm se filloi realizimi i misionit të informimit të qytetarëve për rrjedhat aktuale në komunë, por ajo u bë misionare e afirmimit të vlerave të shumta të traditës kulturore të kësaj treve, duke pasqyruar në mënyrë të denjë dhe të besueshme realitetin i ngjarjeve dhe zhvillimeve aktuale në komunë.

Radio Gjakova 34 vjet me juPërmes valëve të Radio Gjakovës të cilat u bënë ushqim i përditshëm shpirtërorë i mijëra dëgjuesve, u transmetuan qindra e qindra emisione zhanresh të ndryshme duke përfshirë këtu edhe ato dokumentare përmes të cilave u shënuan ngjarjet më të rëndësishme të historisë së bujshme të kësaj treve.

Këtë mision Radio Gjakova po e vazhdon edhe më tej  duke synuar ta qojë ende më përpara zhvillimin e sajë të përgjithshëm programorë.

Radio Gjakova sot përmes transmetimit në internet ka zgjeruar dukshem degjueshmerine dhe  është bërë pjesë e diasporës jo vetëm gjakovare anekënd botës.