Gjakova ka traditë industriale prandaj u shpall Zonë e Lirë Ekonomike

Ministri I Tregtisë dhe Industrisë në Qeverinë e Kosovës, Bernard Nikaj,  tha të premten  se Gjakova dhe Mitrovica janë shpallur zona të lira ekonomike për faktin se kanë potencial dhe histori industriale, ndaj do të gëzojnë lehtësira për prodhuesit e në veçanti për eksportuesit.

Nikaj këto komente I bëri në Gjakovë në një takim që komuna e organizoi me bizneset e vogla dhe të mesme e ku u sqaruan shumë gjëra që kanë të bëjnë me lehtësirat për bizneset që hyjnë në këtë zonë.

Ministri Nikaj, gjatë prezantimit të reflektimit të vendimit të Qeverisë  për shpalljen Zona të Lira Ekonomike të dy komunave të Mitrovicës dhe Gjakovës, tha se një vendim i tillë do të ketë ndikim direkt në ulje të papunësisë dhe varfërisë që ka kapluar këto komuna. Me këtë rast ai ka falënderuar kryetaren e komunës Mimoza Kusari lila për gjitha përpjekjet që ka bërë për të ardh deri tek kjo fazë.

“Këto zona ekonomike kanë për qëllim të ofrojnë infrastrukturë më të mirë për bizneset, kushte më të mira për prodhuesit që kanë për qëllim eksportet, si dhe lehtësira për këto lloje të bizneseve.  Ne besojmë se duke ofruar kushte të tilla përmes zonave të lira ekonomike do të arrijmë të tërheqim një numër të konsiderueshëm të investimeve të huaja dhe atyre vendore, duke ndikuar direkt në ulje të papunësisë dhe varfërisë që ka kapluar këto komuna”, ka thënë ministri Nikaj.

Bizneset që vendosen në kuadër të zonave ekonomike do të jenë përfitues të lehtësirave me qëllim të përballimit të investimeve të tyre. Udhëzimi parasheh që mallrat që shërbejnë si inpute për bizneset që veprojnë në zonat e lira ekonomike, nuk paguajnë pagesën e detyrimeve të importit, pra do të shtyhet pagesa e taksave doganore deri atëherë kur ato plasohen në qarkullim të lirë brenda Kosovës, njëjtë sikurse veprohet me Depot Doganore. Mallrat që dalin nga zonat e lira ekonomike e që eksportohen/ ri-eksportohen, nuk paguajnë ndonjë ngarkesë të detyrimeve doganore. Gjithashtu, me rastin e importit të mallrave të cilat janë të destinuara për zonat e lira ekonomike të gjitha detyrimet doganore mbulohen me garanci bankare. Bizneset e vendosura në zonat e lira ekonomike janë të liruara nga çdo tarifë doganore për shfrytëzim të sistemit të depos doganore…

Kryeshefi i Agjencisë për Promovim të Investimeve në Kosovë (APIK), Valdrin Lluka pasi vlerësoi si mjaft të rëndësishëm për zhvillimin ekonomik procesin e shpalljes dhe funksionimit të bizneseve në zonat e lira doganore  tha se do të caktohen zona ku do të veprojnë bizneset të cilat do të aplikojnë për të shfrytëzuar lehtësirat duke shtuar prodhimtarinë e vet, blerjen e pajisjeve prodhuese dhe gjetjen e tregut të jashtëm, sëpaku në masën 20 % të prodhimit.

“Nga muaji  prill do të publikojmë aplikacionet për përfshirje në këto zona. Të gjitha bizneset  prodhuese kanë të drejtë garimi, në dy grupe. I pari  grup I bizneseve prodhuese do të ketë mundësi përfitimi të grandeve nga 10 mijë deri në 20 mijë euro  për zgjerim të kapaciteteve ekzistuese prodhuese dhe grupi dytë nga 10 deri në 60 mijë euro për ato biznese që parashohin hapjen e linjave të reja prodhuese’ tha Lluka.  

Kryetarja e komunës Mimoza Kusari Lila ka inkurajuar bizneset gjakovare që të bashkëpunojnë me komunën për të përballuar sfidat në punën e tyre dhe për ta fuqizuar projektin e Zonës së Lirë Doganore.

“ Interesat e juaja në këtë rrafsh ekonomik, do të plotësohen apo realizohen me  profite të arritshme  që është forca punëtore, shërbimet që do ofrohen , kërkesat për lëndë të parë, lirimi nga dogana për import e  eksporte dhe shumë shërbime të cilat do të favorizojnë  zhvillimin e qëndrueshëm  ekonomik të biznesit të juaj”, ka thënë kryetarja e Gjakovës.

Ajo më tutje tha se …”Me ecurinë e përfshirjes së bizneseve në Zonën e lirë doganore do të merret Bordi Konsulent I Bizneseve që do të zgjidhet nga përfaqësuesit e të gjitha fushave ekonomike I cili do të marrë parasysh kërkesat dhe interesat e bizneseve dhe duke shërbyer si urë lidhëse mes komunës apo edhe Qeverisë së Kosovës”.

Përfaqësuesit e bizneseve kërkuan sqarime shtesë për procedurat e pjesëmarrjes në grande dhe përfshirjen e tyre në lehtësirat që mundëson Zona e lirë doganore.