Edhe tri ditë votimet për Zgjedhjet lokale 2017

Edhe tri ditë kanë ngelur për subjektet politike për  të promovuar kandidatët për kryetar komune dhe asamble komunale. Të shtunën është ditë e heshtjes zgjedhore ndërsa për këto tri ditë   programet e tyre qeverisëse për mandatin e ardhshëm po i shpalosin subjektet politike para anëtarësisë, simpatizantëve dhe përgjithësisht votuesve. Pikërisht për këtë janë shtuar takimet elektorale  dhe aktiviteti parazgjedhor për zgjedhjet lokale të 22 tetorit  në komunën e Gjakovës po merr hovë për të arritur në finalizim ditën e premte. Më pastaj u mbetet votuesve të zgjedhin kandidatët me të cilët mundë të arrihet një zhvillim i shumëpritur ekonomik dhe mirëqenie sociale.  Komuna e Gjakovës llogaritet ndër komunat me shkallën më të ulët të zhvillimit ekonomik  që nga paslufta .

Për Zgjedhjet Lokale janë dy fletëvotime, një për Kryetar të Komunës i cili do të ketë ngjyrë të verdhë dhe një për Kuvend Komunal i cili do të ketë ngjyrë të kaltër. Hapi I parë është që pasi të hyni në kabinën e votimit, sigurohuni që fletëvotimet janë të vulosura. Pastaj në fletëvotimin për Kryetar Komune, ku janë të renditur emrat e kandidatëve, ju duhet të shënjoni vetëm një kandidat. Hapi I tretë është që në fletëvotimin për Kuvend Komunal, në anën e majtë të tij, ju duhet të shënjoni vetëm një subjekt politik, kurse në anën e djathtë të fletëvotimit duhet të shënjoni vetëm një kandidat. Për të mbrojtur fshehtësinë e votës, paloseni fletëvotimet para se të largoheni nga kabina. Për të votuar, mjafton të keni njërin prej këtyre dokumenteve të identifikimit: Letërnjoftim,  Pasaporta apo mjafton të keni  edhe patentë shoferi. Të gjitha vendvotimet do të happen të dielen  në orën 07:00 dhe do të mbyllen në orën 19:00.