Erdh pranvera!

Anipse jemi mësuar që pranvera sipas kalendarit tradicional të stinëve  të filloi me 21 mars, kjo këtë vit ka  ndodhë një ditë më herët. Në hemisferën veriore të lëmshit tokësor sot( e enjte)  nga ora 17 e 57 minuta nisi stina më e bukur e vitit pranvera, e cila do të zgjasë deri më 21 qershor. Në të njëjtën kohë, në hemisferën veriore nis vjeshta. Po sot dita e nata janë të barabarta.  Me fillimin e pranverës nis edhe llogaritja verore e kohës. Por, ora do të ndërrojë mes natës 29 e 30 mars, kur ora kthehet për një orë përpara. Ky ndryshim gjithmonë bëhet të dielën e fundit të marsit.

Ende pa ardhë kjo stinë kishim një mot të ngrohtë edhe gjatë muajit shkurt dhe mars. Kjo ka bërë që prodhuesit bujqësorë të komunës së Gjakovës të  përshpejtojnë  ritmet e punës në ara. Në shumë sipërfaqe të zonës së Hasit dhe Rekës së mirë e të Dushkajës po punohet intensivisht në përgatitjen  e tokës  për mbjelljet pranverore. Një atmosferë pune e mobilizimi për të kryer me sukses këtë operacion të rëndësishëm bujqësorë po e tregojnë këtyre ditëve veçanërisht perimtarët e zonës së Rugovës. Në disa sipërfaqe veç janë mbjellur hektarët e parë me rasatin e perimeve të hershme. Zakonisht në komunën e Gjakovës mbillen rreth një mijë hektarë me perime, e shpresohet se kjo sipërfaqe do të jetë e mbjellur edhe këtë pranverë.

Mimoza uron për Sulltan Nevruzin

“Jam shumë e lumtur që me ndjesi dhe urim të posaçëm t’ju adresohem në këtë ditë të bekuar të Sulltan Nevruzit, ditë e cila simbolizon nismën e ripërtrirjes së jetës, duke kontribuar, punuar, shpresuar dhe besuar për paqen dhe dashurinë”, me këto fjalë i është drejtuar bashkëqytetarëve të saj, e para e Gjakovës, Mimoza Kusari-Lila.

Sipas saj, kjo ditë e shënuar fisnike e cila festohet sipas riteve të përcaktuara na jep besimin për një rilindje, për të rinisur përkushtimin, me mundësitë që na krijon hyrja në stinën e Pranverës.

“Uroj bashkëqytetarët e mi që kjo ditë e shënuar për besimtarët të jetë një ogur i mirë dhe bashkërisht të përjetojmë, gëzojmë dhe të mbështetemi tek forca e mendjes dhe punës sonë që është shprehje e dedikuar ndaj Zotit”, citohet ajo, në një komunikatë për shtyp të lëshuar nga Komuna e Gjakovës.