Vëllaznimi ka mundur Sigal Prishtinën në kryeqytet me rezultat 74:86 (13:19, 24:24, 21:24, 16:19), në kuadër të javës së 20-të në Superligën e Kosovës në basketboll. Kjo fitore erdhi pas një loje të shkëlqyer të “Kuq e zinjve” të përforcuar me basketbollistë amerikan dhe shefin e ri të shtabit teknik, kroatit Branimir Paviq.
Fillimi i ndeshjes ishte i barabartë, por më pas shkëputen mysafirët në 7:19, derisa çereku i parë përfundon 13:19. Kuqezinjtë edhe në periodën e dytë kishin epërsi në nëntë pikë, 19:28, por një seri e mirë e vendasve bën që bardhekaltrit të kalojnë në epërsi 30:29. Pas loje të barabartë, skuadra nga Gjakova ishte më e mirë në fund dhe përfundoi pjesën e parë në të mirë të saj 37:43.
Vëllaznimi e nisi pjesën e dytë shumë më mirë, duke pasur epërsi në 13 pikë, 48:61, kurse rezultati në semafor pas 30 minutash ishte 58:67. Në 10 minutat e fundit përkundër përpjekjeve të vendasve, Vëllaznimi arriti të menaxhojë epërsinë, madje edhe ta shtojë dhe në fund triumfoi 74:86.
Te Vëllaznimi më të dalluarit ishin Emmanuel Emogbo me 36 pikë e 15 kërcime dhe Ty Nichols me 26 pikë e gjashtë asistime.
KB Vëllaznimi ka pesë fitore dhe 15 humbje dhe po bënë përpjekje për tu shmangur nga fundi i tabeles .
