Ndërroi jetë poeti Halil Haxhosaj që la gjurmë në krijimtarinë letrare

Në moshën 70-të  vjeçare (1946-2017) të hënën është ndarë nga jeta Profesori dhe poeti Halil Haxhosaj. Halil Haxhosaj, ishte krijues i shquar, autor i dhjetëra librave me poezi e prozë, kritik letrar, inspiruesi dhe organizatori i shumë veprimtarive të rëndësishme letrare bashkë me Mitingun e Poezisë, bashkëpunëtor dhe  redaktori gjuhësor i shumë revistave. Krahas shkrimeve Halil Haxhosaj punoi edhe si profesor i gjuhës shqipe në shkollën e mesme të mjekësisë “Hysni Zajmi” në Gjakovë gjersa në opinion njihet si njeri ndër të parët që ringjalli  klubin letrar “Gjon Nikollë Kazazi” të Gjakovës. Ishte fitues i disa çmimeve Nacionale për letërsi.

Profesorin Haxhosaj e kanë karakterizuar shumë tipare që e lartësojnë jo vetëm si krijues por edhe si një nxitës dhe mbështetës për talentët e rinjë, njeri human me vyrtyte të larta. Sikurse shumë redaksi me të cilat bashkëpunoi, edhe Redaksia e revistës Gjakovapres ka mbetur pa bashkëpunëtorin e denjë i cili botoi shkrime, analiza e kritika për teatrin. Halil Haxhosaj do të mbetet figurë e shquar që lë gjurmë në krijimtarinë letrare, si personalitet letrar i letrave shqipe. Duke njohur edhe aspektet teorike të letërsisë, më lehtë se shumëkush tjetër diti të futet skutave embrionale të krijimtarisë letrare për të nxjerrë në dritë një botë karakteristike, e cila ka shërbesën e dijes dhe pasurisë letrare si qëllim. Kjo pasuri mbetët pjesë e të gjithëve. Duke shtrydhur me elegancë frymëzimin shpirtëror, pa dyshim se rrjedh edhe e bukura në art.

Me këtë rast i shprehim ngushëllime familjes, miqve dhe të afërmëve. Bëhet me dije se mbledhja komemorative mbahet të martën në ora 12:30 maj ne sallën solemne te Pallatit te Kulturës në Gjakovë si dhe homazhet bëhen në hollin e Pallatit të Kulturës nga ora 13:30. Varrimi bëhet me 23 maj në ora 15:00 në varrezat e qytetit në Gjakovë.