![](data:image/svg+xml;base64,PHN2ZyBoZWlnaHQ9IjI4NSIgd2lkdGg9IjQ1MyIgeG1sbnM9Imh0dHA6Ly93d3cudzMub3JnLzIwMDAvc3ZnIiB2ZXJzaW9uPSIxLjEiLz4=)
Për dy orë në skenën e Pallatit të Kulturës Asim Vokshi në Gjakovë, të enjten në mbrëmje ka jehuar këndshëm kryesisht kënga elbasanase përmes vëllezërve Mehdi e Demir Zena dhe mysafirëve të tyre shoqëruar nga orkestra dhe valltarët. Edhe me këtë koncert tek këngët e vëllezërve Zena, që janë pasardhësit e denjë të usta Isuf Myzyrit u ndie zemra që nuk plaket nga dashuria dhe shpirti që mallëngjehet nga dhimbsuria. Zëri i ëmbël dhe repertori i gjerë i këngëve të vëllezërve Zena i bënë këta artist të dashur për publikun që mbrëmë pas çdo kënge morën duartrokitje të gjata. Ky koncert erdhi si një bashkëpunim i dy komunave. Fillimisht ishte shfaqur edhe në Elbasan . Këtë mbrëmje e pasuruan me këngë nga të gjitha trevat shqiptare edhe edhe mysafirët e ftuar si: Shkëlzen Jetishi-Xeni, Zenel Doli, Edi Furra, Eglantina Toska, Xhavit Dedej dhe Astrit Shengjergji. Orkestri i zgjeruar popullor u drejtua nga dirigjenti Blerim Narazani, ndërsa grupi vallëtarëve solli valle të bukura me motive elbasane. Paraqitja e këngëtarëve gjakovarë, Xenit, Zejnelit dhe Edit që sic thanë janë rritë me këngët elbasanase, solli plot emocion ndërsa ndër pikat më atraktive ishin këngët e interpretuara nga gjithë grupi i këngëtarëve që për shumë dekada jemi mësuar ti dëgjojmë të interpretuara nga Mehdi dhe Demir Zena.
Të gjitha interpretimet u ndoqën me duartrokitje ndërsa në fund nuk munguan lulet dhe përgëzimet për një mbrëmje të bukur artistike që Gjakova përjetoi në prag të Ditës së Çlirimit.(