Çrregullimeve dhe kolonave të gjata në qarkullimin e trafikut nëpër rrugën kryesore të qytetit duket se po u vjen fundi. Kompania KFW e cila është duke realizuar projektin për shtrirjen e rrjetit të kanalizimit në komunën e Gjakovës, ka njohtuar sot qytetarët se tashmë është në fazën finale të rigjenerimit të rrugëve të dëmtuara gjatë punimeve. Asfaltimi i pjesëve kah është shtrirë rrjeti i ri i ujërave të zeza, pritet të përfundoj gjatë kësaj fundjave dhe rruga kryesore „Nëna Terezë“ të rikthehet për qarkullim të automjeteve nga dita e hënë, me datë 8 Korrik .
Ky është një lajm i mirë për gjithë pjesëmarrësit në trafik por edhe për bizneset . Pluhuri, zhurma dhe shpeshherë pamundësia e qarkullimit të automjeteve, ka tre muaj që i ka penguar qytetarët në qendër të Gjakovës. Ankesa kishin edhe bizneset që operojnë përgjatë kësaj rruge. Pronarët e tyre janë ankuar se këto punime kanë bërë që të kenë punë më pak.
Në anën tjetër, të kujtojmë se komuna me këto punime po realizon investime kapitale në zgjerimin e rrjetit të kanalizimit që finalizohen me Impiantin e ujërave të ndotura që po ndërtohet tek Zidi Sadikages.