Si do të shënohet Dita e mësuesit, 7 Marsi

Në të gjitha trevat shqiptare,  shënohet 7 Marsi – Dita e Mësuesit, e cila është një ngjarje me rëndësi kulturore, ku të gjithë kujtojnë mësuesit e parë të shkronjave shqipe. Dita e mësuesit është një festë, e cila i kushtohet personelit edukues të shkollave dhe universiteteve. Gjakova,  me të drejtë konsiderohet si vatra e arsimit në gjuhën shqipe.

Në vitet kur errësira e analfabetizmit dhe dhuna e pushtuesit rëndonte mbi çdo gjë që ishte shqiptare, u gjetën burra që u përballën me vështirësitë e kohës dhe, pa marrë parasysh pasojat e rënda për vetveten, organizuan në  mënyra të ndryshme përhapjen e arsimit në gjuhën shqipe. Në këtë datë të rëndësishme  kujtojmë mësuesit e parë gjakovarë: Nimon Ferizin, Ibrahim Fehmiun, Ibrahim Kolçin, Ferid Imamin, Baba Qazim Bakallin, Abdullah Hadrin,  e të tjerë që qysh në vitet e hershme të shekullit të kaluar  hapën shkollën e parë shqipe “Skënderbeu” në qyteti tonë.

Ndryshe, kjo datë ka zanafillën e hershme, që të kujton themelet e para të shkollës shqip, Mësonjëtoren shqipe të Korçës, e cila u themelua më 7 mars 1887. Festa e mësuesit në rrafshin kombëtar shërben për t’i vlerësuar traditat më të mira të shkollës shqipe, pa dyshim edhe figurën e nderuar të mësuesit, por edhe gjithë punonjëseve të arsimit si edukatorë të brezit të ri dhe si kontribuues aktiv të zhvillimit dhe përparimit të shoqërisë shqiptare.

Shoqata e veteranëve të arsimit 7 marsi në Gjakovë në bashkëpunim me shoqatën e intelektualve Jakova,  me rastin e ditës së mësuesit, 7 Marsit, do të organizojnë një akademi përkujtimore dedikuar 14 mësuesve me rastin e 120, 110 dhe 100 vjetorit të lindjes së tyre. Akademia do të mbahet të enjten më 7 Mars  prej ores 12  në biblioteken Ibrahim Rugova.

Me rastin e 7 marsit, ditës së mësuesit, nesër Drejtoria e Arsimit në Gjakovë, do të organzoj një aktivitetet me të ftuar  nga fusha e arsimit.  Sipas agjendës, është paraparë që me një fjalë rasti të pranishmëve ti drejtohet kryetari I komunës, Ardian Gjini. Më pas, drejtoresha e Arsimit, Eranda Kumnova Baci do të bëjë një prezantim të projekteve që kanë realizuar në shkollat e komunës sonë. Gjatë aktivitetit është parparë edhe ndarja e mirënjohjeve për mësimdhënës të dalluar  si dhe do të bëhet një prezantim për karakteristikat e shkollave. Ky aktivitet mbahet në shkollën e muzikës, me fillim në ora 13.00.