Vëllaznimi mposht liderin Trepça, ecë drejtë sukseseve të reja

Basketbollistët e Vëllaznimit nuk ka kush ti ndal, as lideri i Ligës Trepça e cila të shtunën në mbrëmje u mposht në Pallatin e sporteve Minatori në Mitrovicë me rezultat 78:72. Kjo fitore ka gëzuar pa masë adhuruesit e basketbollit në Gjakovë.

Kryesia e klubit në faqen zyrtare ka thënë se është arritur një tjetër triumf i madh në Superligën e Kosovës, duke mposhtur si mysafir ekipin e Trepçës falë performancës fantastike nga i gjithë ekipi.

“Falënderues dhe mirënjohës ndaj lojtarit tonë të gjashtë, Kuqezinjve të Jakovës të cilët udhëtuan drejt Mitrovicës për të qenë afër ekipit. Si dhe natyrisht një falënderim klubit të Trepçës dhe gjithë Mitrovicës për mikpritjen e zakonshme. Vlen të ceket se skuadra u paraqit sonte pa dy lojtarët, Jason Jitoboh e Myreon Jones për shkak të lëndimeve, por që pjesa tjetër dha maksimumin për të arritur qëllimin”, thuhet në KB Vëllaznimi menjëherë pas takimit.

Jericole Hellems ishte më i dalluari me 23 pikë, derisa Trey Anderson kishte 14 e Arian Azemi shtoi 12 pikë të tjera. Performancë tejet të mirë dhe me disa pikë vendimtare shfaqi edhe Don Polloshka që kishte 9 pikë, 5 asiste e 2 kërcime.